Drejtuesit politikë të PS-së në disa qarqe, Belinda Balluku, Ogerta Manastirliu, Mirela Kumbaro dhe Bledi Çuçi gjatë kësaj fundjave ishin në Athinë dhe Janinë ku janë hapur edhe zyra informuese për të asistuar të gjithë shqiptarët që jetojnë jashtë vendit për të marrë pjesë në zgjedhjet parlamentare të 11 majit.

Drejtuesja politike e PS e Qarkut Fier, Belinda Balluku u shpreh se gjatë takimit me bashkëatdhetarët tanë, i informuan dhe i qartësuan ata për procesin e regjistrimit dhe më tej akoma, për pjesëmarrjen në procesin e votimit.

Burimi ATSH

Zv.kryeministrja Balluku nënvizon se diaspora shqiptare ka qenë dhe do të mbetet një forcë e rëndësishme jo vetëm për lartësimin e imazhit të Shqipërisë në botë, por edhe për ndikimin që ka në zhvillimin ekonomik e social te vendit.

Ajo u bëri thirrje shqiptarëve të Diasporës që të regjistrohen për të votuar në zgjedhjet e përgjithshme, një mundësi kjo për herë të parë në histori nga katër anët e botës kudo që ata jetojnë dhe punojnë.

“Një thirrje për të gjithë shqiptarët e Diasporës. Kjo është një mundësi historike për të votuar në zgjedhjet e 11 majit 2025 për “Shqipërinë 2030”, bëri thirrje bashkëdrejtuesja politike e PS për Qarkun Tiranë, Ogerta Manastirliu.

Drejtuesja politike e Qarkut Gjirokastër, Mirela Kumbaro u shpreh se “komuniteti shqiptar po tregon një interes të madh për ushtrimin e të drejtës së votës nga diaspora në zgjedhjet e 11 Majit, me dëshirën dhe krenarinë për ta çuar Shqipërinë në majën që i takon, në familjen e madhe evropiane”. “Ky është një proces administrativ. Pjesa më e bukur është fryma, pasoni dhe dëshira për Shqipërinë 2030. Ky është mesazhi më i mirë që morëm në këto 3 ditë në Janinë dhe në Athinë”, deklaroi ajo, duke shtuar se “ne e mbajtëm fjalën dhe e miratuam ligjin për votimin nga jashtë vendit, tani është radha juaj të na jepni mbështetjen që të vazhdojmë përpara Bashkë për Shqipërinë 2030”.

Drejtuesi politik i PS në Qarkun Vlorë, Bledi Çuçi deklaroi se “ne kemi ngritur zyrat tonë për të asistuar shqiptarët për regjistrimin si dhe numrat e telefonit në dispozicion për t’i asistuar edhe aty ku ata banojnë nëse nuk vijnë dot në zyra. Pra kemi ngritur grupe lëvizëse që të vijnë t’u asistojnë në vendit ku ju jetoni”.

Ai apeloi të gjithë shqiptarëve të Diasporës që të regjistrohen dhe mos të humbin të drejtën për të votuar.

Këtë fundjavë nisi për herë të parë në historinë e zgjedhjeve pluraliste regjistrimi i votuesve të 11 majit në diasporë. Kush është jashtë dhe dëshiron të marrë pjesë në zgjedhje, duke votuar me postë nga aty ku banon, duhet të regjistrohet në Platformën Elektronike të Komisionit Qendror të Zgjedhjeve: https://diaspora.kqz.gov.al.