Ambasadori i Bashkimit Evropian në Tiranë, Silvio Gonzato bëri thirrje për veprim urgjent për ta njohur femicidin si krim të veçantë dhe për të përforcuar parandalimin e dhunës ndaj grave dhe vajzave.

Deklarata erdhi në konferencën e organizuar nga Avokati i Popullit, “Femicidi: Problem social përtej statistikave”, ku morën pjesë autoritete shtetërore e zyrtarë qeveritarë si dhe organizata të shoqërisë civile.

“Dhjetëra gra dhe vajza kanë humbur jetën vitet e fundit në Shqipëri për shkak të dhunës me bazë gjinore ndërkohë që tendenca është në rritje. Pas këtyre shifrave qëndrojnë histori të pathëna të dhunës dhe diskriminimit në familje”, u shpreh Gonzato në fjalën e tij.

“BE-ja është e përkushtuar të mbështesë institucionet shqiptare për t’i dhënë fund dhunës me bazë gjinore. Dhuna ndaj grave nuk ka vend në shoqëritë tona”, u shpreh Gonzato.

Ministrja e Shëndetësisë dhe Mbrojtjes Sociale, Albana Koçiu në fjalën e saj njoftoi se 12 vajza dhe gra humbën jetën në Shqipëri në vitin 2023, ndërsa 5 fatalitete të tjera kanë ndodhur deri në shtator të këtij viti.

Sipas saj, zgjidhja më efektshme për të luftuar “femicidin” është të luftohen arsyet që motivojnë këtë fenomen në origjinë si rolet gjinore dhe stereotipet.

Kryeparlamentarja Elisa Spiropali nënvizoi nga ana e saj se është e nevojshme të rritet kontrolli mbi zbatueshmërinë e legjislacionit për ndëshkueshmërinë e dhunuesve dhe të përmirësohet legjislacioni ekzistues aty ku është e nevojshme. Ajo e konsideroi propozim që duhet vlerësuar, propozimin e Avokatit të Popullit drejtuar Ministrisë së Drejtësisë në prill të këtij viti, mbi parashikimin në Kodin Penal të Femicidit si vepër penale e veçantë.