Komisioni i posaçëm kundër dezinformimit do të mbështetet nga Bashkimi Europian, me një grup ekspertësh nga vendet e anëtare të BE-së.

Për këtë qëllim, BE-ja po zhvillon trajnime ku ambasadori i Bashkimit Europian në Shqipëri, Silvio Gonzato theksoi se puna e komisionit të posaçëm nuk duhet të cenojë lirinë e medias në vend.

“Të gjitha nismat për t’u përballur me manipulimin e informacionit, si dhe sigurimin e lirisë së medias, nuk mund të jenë njëra në kurriz të tjetrës. Lufta kundër ndërhyrjes së huaj apo dezinformimit nuk ka të bëjë thjesht me rregullimin e medias në internet apo, më keq, me moderimin e përmbajtjes, por kërkon një qasje më të gjerë, që duhet të përfshijë përmirësimin e kuadrit ligjor për ndërhyrjen në proceset demokratike. Sa i takon transparencës dhe qasjes së gjerë, duhet të vazhdojnë konsultimet me shoqërinë civile, që është shumë e rëndësishme”, theksoi Gonzato.

Kryetari i komisionit të dezinformimit, Erion Braçe, tha se “puna e këtij komisioni ka nxjerrë në pah mungesën e kuadrit ligjor që vendi ynë ka në raport me dezinformimin, si dhe formalizimin e mediave online”.

“Jemi të papërgatitur në aspektin ligjor dhe të infrastrukturës për të adresuar dezinformimin dhe, kryesisht, sulmet kibernetike”, u shpreh Braçe.

Braçe vuri në dukje se “liria e shprehjes dhe informimit janë jetike për një demokraci, sidomos në sektorin e posaçëm të medias, ku liria e shprehjes është themelore, ndërsa informalet nuk ndodhen në asnjë regjistër të shtetit shqiptar”.

Drejtoresha ekzekutive e SCiDEV dhe përfaqësuese e SafeJournalists Network në Shqipëri, Blerjana Bino, tha se “aktualisht, shqetësimet tona përfshijnë mungesën e një përfshirjeje më të gjerë në seancat dëgjimore, vonesa në angazhimin dhe konsultimin me ekspertët, shoqërinë civile dhe median, si dhe vonesat në publikimin e vendimeve. Gjithashtu, kërkojmë përmirësim të koordinimit mes komisioneve parlamentare dhe përfshirje të opozitës për të siguruar një proces të gjithanshëm dhe transparent”.

(ATSH)