Kryeministri Edi Rama, gjatë një takimi me komunitetin shqiptar në Nju Jork, deklaroi se përfshirja e emigrantëve në politikën aktive në Shqipëri tashmë është e mundur.

Duke iu përgjigjur pyetjes së një qytetari, në lidhje me përfshirjen e emigrantëve në politikë, Rama theksoi se nëpërmjet platformës “Deputetët që duam” ata që duan të kandidojnë për deputet dhe jetojnë në Amerikë mund të aplikojnë.

“Pa mbështetjen e emigrantëve Shqipëria do të kishte hyrë në situata shumë më të rënda se ato që hyri me krizat tragjike të së shkuarës ku ajo e ’97-ës ishte më e llahtarshmja. Ishin emigrantët që na mbajtën në këmbë me familje. Është një mund i madh që emigrantët kanë dhëne për Shqipërinë”, u shpreh Rama.

“Tani për sa i përket përfshirjes së emigrantëve, apo të atyre që janë sot banorë në vende të ndryshme jashtë Shqipërisë, drejtpërdrejtë në politikë dhe përfaqësimi i tyre në parlament, ne kemi hapur një platformë dhe i kemi ftuar të gjithë ata që duan të kandidojnë për deputet të përfshihen, dhe ne do të zgjedhim edhe mes atyre që kanë shprehur interesin, edhe nga Amerika”, tha Rama.

Kreu i qeverisë, njëkohësisht kryetar i PS-së, tha se në listën e deputetëve të PS do të ketë edhe shqiptarë që jetojnë në emigracion.

“I dhashë dorën një vajze që e kam takuar në një nga ato takime, kishte ardhur posaçërisht nga SHBA dhe është një nga kandidatët që kanë shprehur interes. Të jeni të sigurt se në listën e deputetëve për zgjedhjet e ardhshme do të gjeni në të gjitha qarqet edhe shqiptarë që janë sot në emigracion. Ju takon ju t’i jepni mbështetjen me votë dhe ata të jenë në parlament”, u shpreh Rama.

(ATSH)