Kryetarja e Kuvendit, Elisa Spiropali nisi sot takimet në kuadër të programit “Kuvendojmë për Shqipërinë”, në qarkun e Beratit, i cili po zhvillohet gjatë Javës së Gjelbër të Kuvendit.

Spiropali u takua me kryetarët e bashkive Berat, Kuçovë dhe Dimal.

Gjatë takimit të kryetares Spiropali me kryetarin e Bashkisë Berat, Ervin Demo, u diskutua për investimet në infrastrukturë, shërbimet për qytetarët, arsimin, turizmin, sipërmarrjet dhe inovacionin.

Demo shprehu fillimisht vlerësimet për programin “Kuvendojmë për Shqipërinë”, ndërsa nënvizoi se Bashkia Berat është nga ato bashki që ka pësuar transformim të jashtëzakonshëm dhe kjo ndjehet tek qytetarët.

“Kemi investime të mëdha të planifikuara. Transformimet në bashkinë Berat janë të jashtëzakonshme. Kemi investime edhe në sistemin arsimor. Ndërsa për sa i përket turizmit, dua të flas dhe me shifra. Po i afrohemi 1 milionë turistëve”, u shpreh Demo.

Kryetarja e Kuvendit u shpreh se nuk do të mungojë mbështetja ndaj qytetit të Beratit për të qenë më pranë qytetarëve.

Gjatë takimit me me kryetarin e Bashkisë Kuçovë, Kreshnik Hajdari, kryetarja Spiropali, u shpreh se problemet e qytetarëve, komuniteteve lokale dhe qeverisjes vendore janë prioritet i Kuvendit dhe deputetëve.

Sipas saj, “vëmendja e kthyer nga bashkitë me ndryshimin e politikës së pagave për pushtetin vendor, është pozitive dhe mundësi për të marrë dhe mbajtur në punë profesionist të aftë”.

“Kjo është një mundësi shumë e mirë që u jepet bashkive që të tërheqin nga tregu në mënyrë konkurruese profesionistë, të jenë sa më eficiente, të kenë mundësi të rrisin treguesit e performancës dhe që kjo e fundit të jetë e lidhur gjithashtu edhe me financimet”, theksoi Spiropali.

Spiropali nënvizoi se skema e granteve të BE-së për bashkitë është një mundësi shumë e mirë që u ofrohet atyre sot, për investime në infrastrukturë, shërbimet publike, zhvillimin ekonomik vendor, krijimin e vendeve të reja të punës, fuqizimin e të rinjve etj.

Në vijim, Spiropali, së bashku me kryetarin e Bashkisë, Hajdari dhe Tomi Bebi, drejtues i Qendrës Shëndetësore Kuçovë, bënë një marshim në bulevardin kryesor të qytetit, në kuadër të “Tetorit Rozë”, muajit të ndërgjegjësimit ndaj kancerit të gjirit.

Në fund të marshimit, Kryetarja e Kuvendit theksoi se “mesazhet dhe mbështetja që ne ndajmë sot dhe gjatë gjithë këtij muaji, synojnë të nxisin vetëdijen dhe të përçojnë rëndësinë e kujdesit për shëndetin e çdo gruaje, duke mbështetur ata që përballen me këtë sfidë dhe inkurajuar parandalimin për të gjithë”.

“Ndërgjegjësimi është hapi i parë drejt parandalimit. Do i kërkoja çdo zonje, çdo nëne dhe gruaje mos e nënvlerësoni fuqinë e diagnostikimit të hershëm, është arma jonë më e fortë për të mposhtur këtë sëmundje. Një kontroll sot mund të shpëtojë jetën nesër”, përfundoi Spiropali.

Kryetarja e Kuvendit zhvilloi gjithashtu një takim në qytetin e Dimalit, me kryetaren e Bashkisë së qytetit, Juliana Memaj.

Gjatë takimit, si një bashki me karakter kryesisht rural, kryetarja Spiropali diskutoi skemën e mbështetjes ndaj fermerëve të zonës, të cilët përbëjnë një pjesë të madhe të banorëve të bashkisë, mundësitë për përmirësimin e infrastrukturës në shkolla, planet afatmesme për rritje buxheti për investime të tjera të nevojshme, etj.

(ATSH)