Sot nisi punimet në Gjenevë sesioni i 149 i Asamblesë së Unionit Ndërparlamentar, në të cilin merr pjesë edhe delegacioni i Kuvendit të Shqipërisë, i kryesuar nga kryetarja e Kuvendit, Elisa Spiropali

Në fjalën e saj në sesionin plenar të Asamblesë, Spiropali u njoftoi pjesëmarrësve lajmin se në 15 tetor Shqipëria mban Konferencën Ndërqeveritare me BE për çeljen e grupkapitujve të parë të negociatave, Themelorët.

“Kjo është një arritje e merituar e Shqipërisë dhe Kuvendi do të vijojë të forcojë lidershipin, legjitimitetin demokratik dhe karakterin gjithëpërfshirës të procesit të anëtarësimit”, theksoi kryeparlamentarja.

Në vijim, Spiropali vuri në dukje se, “roli i parlamenteve në mbështetjen e zhvillimit ekonomik e shoqëror po bëhet gjithnjë e më thelbësor. Në ditët e sotme, zhvillimi i çdo vendi po mbështetet gjithnjë e më shumë nga progresi shkencor e teknologjik. Zhvillimi i vrullshëm i dijeve dhe teknologjive po pasohet edhe nga “demokratizimi” i tyre, pra rritja e aksesit në teknologjitë e informacionit dhe inteligjencën artificiale, të grupeve të mëdha të popullsisë, sidomos rinisë”.

Aktualisht, shtoi Spiropali, “Shqipëria ka arritur një përdorim masiv të shërbimeve publike online. Rreth 95% e shërbimeve në vend ofrohen tashmë online. Sfidat e përdorimit të teknologjisë në shërbimet publike shtohen edhe për shkak të rrezikut të sulmeve kibernetike, të cilat vijnë si rrjedhojë e qëndrimeve të vendosura e të qarta të Shqipërisë kundër terrorizmit. Megjithatë ato nuk do të përbëjnë kurrë arsye për ndryshimin e qëndrimeve tona të palëkundura në luftën kundër terrorizmit, për mbrojtjen e sigurisë, paqes, demokracisë dhe lirisë së popujve”.

Spiropali nënvizoi se, “Kuvendi ka miratuar kohët e fundit komisionin e posaçëm për koordinimin e përpjekjeve kundër dezinformimit dhe interferencave të huaja dhe është i vendosur të mbrojë sistemin demokratik prej ndërhyrjeve të huaja malinje”.

Në vijim, Spiropali u ndal edhe në zbatimin e arritjeve të progresit shkencor e teknologjik në mbështetjen e funksioneve, veprimtarive dhe proceseve parlamentare në Kuvendin e Shqipërisë, si inkorporimi i dijeve dhe arritjeve shkencore bashkëkohore në procesin e hartimit të ligjeve, krijimi i strukturave të posaçme të shërbimeve parlamentare dhe ndërtimi i një bashkëpunimi permanent institucional me universitetet dhe institucionet akademike.

Spiropali drejtoi edhe njërën prej seancave plenare të këtij sesioni të Asamblesë.

(ATSH)