Ambasadorja e Republikës së Shqipërisë në Greqi, Luela Hajdaraga, mori pjesë në eventin zyrtar të lançimit të Qendrës së Kërkimit dhe Monitorimit për Turizmin Bregdetar dhe Detar në Mesdheun Lindor, organizuar nga Ministria e Turizmit të Greqisë – Ministry of Tourism, nën kujdesin e Ministres znj. Olga Kefalogianni dhe e mbështetur nga Organizata Botërore e Turizmit – (UNWTO).Gjatë këtij eventi, u nënshkrua Deklarata e Përbashkët për krijimin e Observatorit, i cili do të mbledhë dhe analizojë të dhëna për zhvillimin e qëndrueshëm të turizmit. Ky Observator do të shërbejë si një qendër referimi për monitorimin e ndikimeve ekonomike, sociale dhe mjedisore të turizmit në zonat bregdetare të Mesdheut/ Lindor.

Në këtë aktivitet morën pjesë përfaqësues të lartë nga vendet anëtare, ministra dhe ambasadorë nga Shqipëria, Kroacia, Italia, Qipro, Mali i Zi dhe vende të tjera të Mesdheut, si dhe përfaqësues të Organizatës Botërore të Turizmit, autoriteteve lokale dhe akademikë.

Gjatë fjalës së saj, Ambasadorja Hajdaraga, theksoi angazhimin e Shqipërisë për zhvillimin e qëndrueshëm të turizmit, duke u shprehur: “Shqipëria ka njohur prej kohësh potencialin e madh të turizmit bregdetar dhe detar. Jemi të angazhuar për një turizëm që respekton dhe ruan ekosistemet tona bregdetare dhe jemi të gatshëm të bashkëpunojmë ngushtë me partnerët rajonalë.”

Ky event shënon një hap të rëndësishëm për promovimin e një vizioni të përbashkët për zhvillimin e qëndrueshëm të turizmit në rajon, duke forcuar bashkëpunimin dhe shkëmbimin e të dhënave të besueshme në fushën e turizmit bregdetar dhe detar.