Komuniteti LGBTIQ+ organizoi pasditen e kësaj të shtune një paradë sensibilizuese në bulevardin “Dëshmorët e Kombit”.

Për herë të 12-të, në vendin tonë u organizua parada e komunitetit LGBTIQ+. Kjo paradë bëhet në vazhdimësi të aktiviteteve ku pjesëtarë të këtij komuniteti kërkojnë të drejta të barabarta, të mos diskriminohen dhe të mos bullizohen.

Me parullën “Çdo ngjyrë një familje” dhe thirrjet ‘Rruga është e jona!’, aktivistë të LGBTIQ+ marshuan në bulevardin “Dëshmorët e Kombit’”.

Aktivistja Xheni Karaj, gjatë fjalës së saj tha se komuniteti LGBT+ nuk është një kërcënim për familjen, siç është përshkruar ditët e fundit nga disa përfaqësues të feve, por anëtarët e këtij komuniteti janë pjesë e familjeve shqiptare dhe kërkojnë të drejta të barabarta.

“Kemi parë që javën e fundit ka pasur një gjuhë urrejtje ndaj nesh. Jemi kërcënuar si kërcënim për familjen, ndërkohë që jemi pjesë e familjes së çdo kujt. Ne nuk jemi kërcënim për familjen e askujt. Mesazh uniteti dashurie për njerëzit që të kuptojmë që në fund të fundit jemi si gjithë tjerët dhe jemi pjesë e familjes.

Debate të tilla të dhunshme nuk e ndihmojmë aspak shoqërinë, nuk e ndihmojnë frymën demokratike, pasi në fund të fundit ka pasur shumë persona nga komuniteti që kanë parë prindërit e tyre, të cilët nuk e dinë, duke protestuar kundër fëmijëve të tyre. Duhet të respektojmë njëri tjetrin”, tha Karaj.

Të pranishëm në këtë marshim ishin edhe dy ambasadorë, ai britanik Alastair King-Smith si dhe ambasadori i BE, Silvio Gonzato.

Parada nisi tek instalacioni “Reja”, për të vazhduar në bulevardin “Dëshmorët e Kombit” deri të Presidenca dhe më pas u rikthyen sërish tek “Reja”.