Shefi i Misionit dhe i Ngarkuari me Punë në Ambasadën e SHBA në Tiranë, David Wisner, nxit gazetarët të vazhdojnë të bëjnë hetime të vështira për të mirën e popullit shqiptar.

Mesazhin e tij, Wisner e dha gjatë një takimi me grupin e tetë të Laboratorit të Gazetarisë Investigative, një projekt i menaxhuar nga Qendra Shqiptare për Gazetari Cilësore (ACQJ) me mbështetjen e Ambasadës së SHBA.

Në një postim në rrjetet sociale, Ambasada e Shteteve të Bashkuara të Amerikës në Tiranë ndau detaje nga takimi, ku Wisner u tha pjesëmarrësve se detyra e një gazetari është të formulojë pyetje të vështira.

“Është detyra juaj si gazetarë të bëni pyetje të vështira,” i tha i Ngarkuari me Punë David Wisner pjesëmarrësve nga grupi i tetë i Laboratorit të Gazetarisë Investigative, një projekt i menaxhuar nga Qendra Shqiptare për Gazetari Cilësore (ACQJ) me mbështetjen e Ambasadës së SHBA.”, shkruan Ambasada e SHBA në Tiranë.

Wisner dëgjoi historitë hulumtuese mbi të cilat kanë punuar pjesëmarrësit dhe sfidat me të cilat janë përballur gjatë procesit.

Historitë e tyre, të fokusuara në tema si mediat sociale si mjet për grupet nacionaliste, studentët e shumtë që blejnë një tezë diplome, kushtet për fëmijët në jetimore, gjakmarrja, projektet e rindërtimit, gatishmëria për emergjencat, do të publikohen në faqen e internetit acqj.al pasi të përfundojnë.

Wisner nxiti gazetarët të vazhdojnë të bëjnë hetime të vështira për të mirën e popullit shqiptar.”, përfundon postimi i Ambasadës së SHBA në Tiranë.