Nga Andrea Llukani

Një kënd i posaçëm në pavijonin e Luftës Antifashiste Nacionalçlirimtare në Muzeun Historik Kombëtar i është kushtuar hebrejve të rënë gjatë Luftës së Dytë Botërore në Shqipëri.

Sipas statistikave rezulton se shqiptarët, ishin ndër të paktët popuj që nuk i dorëzuan hebrejtë tek nazistët gjermanë, por i kanë strehuar dhe mbrojtur ata.

Ndërsa gjatë Luftës së Dytë Botërore shumë herbrenj morrën pjesë përkrah forcave partizane, duke luftuar kundër ushtrisë naziste.

Në luftën nacionalçlirimtare të popullit shqiptar mjaft hebrenj ranë heroikisht në fushën e betejës.

Në masakrën e 4 shkurtit, në Tiranë janë masakruar edhe dy hebrenj David Juda Kohen dhe Zhak (Isak) Emanuel Ruben.

David Juda Kohen ka ardhur në Krujë më 16.5.1943 nga Uroshovaci (Jugosllavi). U kap befasisht në natën e 4 Shkurtit 1944, ku u vra së bashku me 84 banorë të tjerë të Tiranës. Atij i është dhënë Statusi ”Dëshmor i Atdheut”, me Vendimin Nr.463, datë 14.09.2011.

Zhak (Isak) Emanuel Ruben ka ardhur nga Prishtina më 5.4.1942 me internim në Kavajë. Fillimisht u inkuadrua në Çetën e Pezës. Në vjeshtën e vitit 1943 u dërgua me detyrë nga komanda e Çetës në Tiranë, ku u kap në befasi nga nazistët gjermanë. U kap befasisht në natën e 4 Shkurtit 1944, ku u vra së bashku me 84 banorë të tjerë të Tiranës. Atij i është dhënë Statusi ”Dëshmor i Atdheut”, me Vendimin Nr.474, datë 14.11.2011.