Ministri për Europën dhe Punët e Jashtme, Igli Hasani po merr pjesë në takimin e 30-të të Këshillit Ministror të OSBE-së, që mbahet në Shkup të Maqedonisë së Veriut, në datat 30 nëntor – 1 dhjetor 2023.
Në kuadër të këtij aktiviteti, Hasani zhvilloi takime dypalëshe me kolegët dhe homologët, José Manuel Albares, Dominique Hasler, Laurence Boone, dhe Murat Nurtleu.

Ministri theksoi se në takime u shkëmbyen mendime për të përmirësuar më tej bashkëpunimin politik dhe ekonomik, duke u fokusuar në nisma konkrete të cilat do të kenë ndikim pozitiv për njerëzit dhe vendet tona.

“Mirëpresim të punojmë ngushtë së bashku për të forcuar akoma edhe më tej partneritetet tona në adresimin e sfidave të përbashkëta të sigurisë, duke punuar krah për krah për një të ardhme më të sigurt dhe më të begatë”, theksoi ai.