Kryetarja e Komisionit për Politikën e Jashtme, Mimi Kodheli mori pjesë në takimin për të diskutuar mbi Procesin e Berlinit me homologët nga vendet e Ballkanit Perëndimor thirrur nga Kryetari i Komisionit për Politikën e Jashtme të Bundestagut gjerman, Michael Roth.

Pjesëmarrës në takim ishin kryetarët e komisioneve të Jashtme të Maqedonisë së Veriut, Kosovës, Bosnjë-Hercegovinës si dhe Serbisë.

Samiti i Procesit të Berlinit do të zhvillohet në Tiranë në datën 16 tetor, por sipas Roth shkëmbimi i hapur dhe i sinqertë, së pari, në nivelin parlamentar do t’i shërbente çuarjes përpara të agjendës evropiane për vendet e Ballkanit Perëndimor.

“Bashkimi Evropian nuk është i plotë pa Ballkanin Perëndimor dhe angazhimi i qeverisë gjermane është që ky rajon të integrohet sa më shpejt. Ky është vetëm takimi i pari i këtij lloji dhe ne do të vijojmë të intensifikojmë takime të tilla të këtij formati për ti dhënë hov shkëmbimeve dhe diskutimeve mes kolegëve në të njëjtën tryezë, duke u përpjekur të evitojmë diskutimet bilaterale dhe duke u fokusuar tek interesi i përbashkët i rajonit”, tha ai.

Kodheli pasi falënderoi Roth për ftesën dhe angazhimin, tha se, Procesi i Berlinit është një instrument thelbësor për rrugën e Ballkanit Perëndimor në BE.

Ajo tha se, Presidenca shqiptare për Procesin e Berlinit është fokusuar tek tema si siguria energjetike, agjenda e gjelbër, edukimi, digjitalizimi, siguria kibernetike si dhe në një plan investimesh.

Në takim mungonte Mali i Zi, si një vend i cili nuk ka formuar ende qeverinë pas zgjedhjeve të zhvilluara në vend.