Ministrja e Bujqësisë dhe Zhvillimit Rural, Frida Krifca, njëherazi e zgjedhur që prej prillit të këtij viti, Presidente e Institutit për Studime të Avancuara Agronomike të Mesdheut (CIHEAM), po  merr pjesë në Samitin e OKB-së për Sistemet Ushqimore, që zhvillohet në selinë e FAO-s në Romë nga 24 deri më 26 korrik 2023.

Në kuadër të punimeve të këtij samiti të rëndësishëm, ministrja Krifca ka zhvilluar edhe takime me liderë nga vendet anëtare të FAO-s, por edhe më gjerë.

Krifca ndau në rrjetet sociale një fotoalbum nga punimet e samitit të OKB-së, ku ndër të tjera është takuar edhe me kreun e Organizatës Botërore së Ushqimit, Qu Dongyn, kreun e Organizatës Botërore të Shëndetësisë, Tedros Adhanom Ghebreyesus, ministrin italian të Bujqësisë, Francesco Lollobrigida, ministrin japonez të Bujqësisë, Katsumata Takaaki. Kreun e organizatës më të madhe të fermerëve në Italia Coldiretti, Ettore Prandinin e shumë aktorë të tjerë botërorë të rëndësishëm që operojnë për forcimin e prodhimit dhe konsumit të qëndrueshëm.

“Fotoalbumi i një dite intensive në Organizatën Botërore të Ushqimit – FAO në Romë, ku po mbahet nën kujdesin e Kryeministres Meloni, Samiti për Sistemet e Ushqimit “UN FOOD SYSTEM SUMMIT +2”, për arritjen e objektivave globale të zhvillimit të qëndrueshëm”, shkroi ministrja Krifca.

Objektivi i samitit është të ofrojë modele drejt ndërtimit të sistemeve ushqimore më efikase, më gjithëpërfshirëse, më të forta dhe më të qëndrueshme.

Krifca, në fjalën e mbajtur në këtë samit të rëndësishëm, vuri theksin tek sfidat serioze me të cilat po përballen sistemet dhe tregjet ushqimore në të gjithë botën.

Ministrja e Bujqësisë Krica, theksoi se “arritja e objektivave ushqimore të zhvillimit të qëndrueshëm të përcaktuara nga Kombet e Bashkuara arrihen më shpejt me anë të adoptimit të politikave mesdhetare të prodhimit”.