Kryeministri Edi Rama priti sot në Tiranë krerët e vendeve të rajonit dhe komisionerin për Zgjerim në Bashkimin Europian, Oliver Varhelyi.

Takimi informal u zhvillua në kuadër të samitit të Procesit të Berlinit që do të mbahet më 16 tetor në vendin tonë.

Ndërsa ndau në rrjetet sociale një foto familjare me pjesëmarrësit në këtë takim, Rama informoi se bisedimet u fokusuan mbi Planin e Ri të mbështetjes financiare dhe ekonomike të BE-së për Ballkanin Perëndimor.

Të pranishëm në këtë takim ishin komisioneri i Bashkimit Europian për Zgjerimin dhe Fqinjësinë, Olivér Várhelyi, kryeministri i Republikës së Malit të Zi, Dritan Abazović, kryeministri i Maqedonisë së Veriut, Dimitar Kovačevski dhe kryeministrja e Republikës së Serbisë, Ana Brnabić.

Në takim nuk ishte i pranishëm kryeministri i Kosovës, Albin Kurti.

Zëdhënësi i qeverisë së Kosovës, Përparim Kryeziu ka sqaruar se kryeministri Albin Kurti e ka njoftuar kryeministrin e Shqipërisë, Edi Rama se nuk do të mund të shkojë në takimin joformal të liderëve të rajonit në Tiranë, pasi muaj më parë e ka konfirmuar pjesëmarrjen në një konferencë në Kretë të Greqisë dhe se paneli për Ballkanin Perëndimor është saktësisht në të njëjtën ditë.

Procesi i Berlinit është një nismë e vitit 2015 për të mbështetur integrimin në Bashkimin Europian të vendeve të Ballkanit Perëndimor.