Kryeministri Edi Rama deklaroi sot se, Shkodra do të zgjojë potencialin e fjetur që ka për ekonominë dhe zhvillimin e Shqipërisë.

Në takimin falënderues në qytetin e Shkodrës, për zgjedhjet e 14 majit, kryeministri Edi Rama tha se, “kam ftuar sot të vijnë këtu disa nga ministrat, sepse ne nuk mund ta refuzojmë këtë sfidë”.

Ai tha se, “kjo është një fitore jashtëzakonisht e veçantë dhe kjo kërkon një vëmendje jashtëzakonisht të veçantë, sepse nga njëra anë na është dhënë një besim i madh, por nga ana tjetër nuk është vetëm çështja e Shkodrës, nuk është vetëm çështja e shkodranëve, këtu është çështja e Shqipërisë dhe ekonomisë së saj. Shkodra është një fuqi e madhe e fjetur në aspektin e potencialit që ka për ekonominë dhe zhvillimin e Shqipërisë. Dhe ne duhet ta zgjojmë sa më shumë këtë potencial, natyrisht për të mirë, në radhë të parë, se janë këtu të shkodranëve, por në funksion të mirë të të gjithë Shqipërisë”.

“Është një zonë që është zona më e bekuar e Shqipërisë. Dhe natyrisht ne nuk mund t’i bëjmë të gjitha. Natyrisht për 4 vite nuk mund të zgjohet i gjithë ky potencial i jashtëzakonshëm, por 4 janë të mjaftueshëm për të filluar dhe bërë një ndryshim që i prek drejtpërdrejtë, jo vetëm sytë, por edhe mendjet e njerëzve dhe i bën njerëzit në Shkodër të jenë krenarë, jo vetëm për historinë, por të jenë krenarë edhe kur dikush vjen, sepse do ta presin në një shtëpi të pastër dhe në një shtëpi ku ke qejf të hysh dhe jo në një shtëpi ku të mbyt papastërtia”, tha ai.