Nga Mentor Kikia

Nderime për çfarë ke bërë Bujar!

Bujar Hudhri është një model, një specie njerëzore në zhdukje, sa i takon vullnetit, ndershmërisë dhe pasionit me të cilin punon. Jo sepse unë e kam mik, por sepse e njoh mjaftueshëm për të arritur në këtë përfundim.

Megjithatë, si botues, ai ka një kontribut të madh, sepse po i lë trashëgim letërsisë dhe memorjes shqiptare, në mënyrën më të përsosur dhe me cilësore, veprën e njeriut më të madh të letërsisë shqipe(nuk dihet se kur Shqipëria të prodhojë sërish një shkrimtar të këtyre përmasave).

Bujari vuri një bast me ekskluzivitetin e Kadaresë, dhe nuk dimë në final se kush fitoi, Bujari, Kadareja apo të dy.

Por, pa Bujarin dhe Onufrin vepra e Kadaresë nuk do të kishte qenë kurrë kjo që është, jo në përmbajtje, por në formë dhe në menaxhim. Sikundër që Onufri, nuk do të ishte ky që është, dhe që tani nuk ndahet dot nga emri i Kadaresë. Eshtë një nga ato raste kur një botues dhe autori i tij lidhen kaq shumë. Ata që e njohin nga afër, dinë edhe se Bujari e Kadareja nuk kanë bashkë vetëm raportin botues-autor, por një marrëdhënie njerëzore shumë përtej saj.

Kadareja do të vlejë përjetësisht për çfarë ka shkuar vetë, por edhe për çfarë do të shkruajnë për të.
Ndaj dhe Bujari ka fatin e madh të jetë edhe biografi më i mirë i tij. Unë e kam kërcënuar që, nëse nuk do ta bëjë, do ta marr “peng” dhe ta detyroj të rrëfehet.