Këshilli Kombëtar për Integrimin Europian zhvilloi sot takimin e radhës ku u diskutua mbi arritjet dhe sfidat e Procesit të Berlinit dhe tregun e përbashkët rajonal.

Në cilësinë e bashkëkryetarit të këshillit, kryetari i grupit parlamentar të PS-së, Taulant Balla “vlerësoi se kemi pasur përpjekje për t’i dhënë një dimension parlamentar Procesit të Berlinit, që në nisje të kësaj iniciative që nga takimi i parë i zhvilluar në gusht 2014 në Berlin dhe në takimin e radhës në Vjenë”.

“Ka ardhur koha ta forcojmë dimensionin parlamentar edhe me kolegët e Bundestagut apo të vendeve të rajonit. Kemi diskutuar dhe mendoj se do të shkojmë në një qasje tjetër”, tha Balla.

Ai shtoi se Procesi i Berlinit është i i pandashëm nga “Ballkani i hapur”.

“‘Ballkani i hapur’ është instrumenti i vetëm i zbatimit të parimeve të Procesit të Berlinit, sepse ndërsa flasim për ato që u iniciuan në gusht 2014, ajo që po sjell ‘Ballkani i hapur’ është zbatimi në territor i parimeve mbi të cilat është ngritur vetë BE, si lëvizja e lirë e mallrave, njerëzve, kapitaleve. Këtë bën ‘Ballkani i hapur’. Unë besoj se ndërsa Shqipëria ka marrë presidencën e Procesit të Berlinit dhe në 16 tetor do të zhvillojmë përsëri në Tiranë samitin vjetor të këtij procesi edhe vendet e tjera të Ballkanit Perëndimor i bashkëngjiten iniciativave së ‘Ballkanit të hapur’, pasi është instrument i domosdoshëm që implementon këto parime”, tha ai.

Në fjalën e saj, bashkëkryetarja e Këshillit, Jorida Tabaku u shpreh se “qytetarët shqiptarë nuk kanë arritur të kuptojnë detyrat e rëndësishme që Procesi i Berlinit ka realizuar gjatë këtyre viteve dhe si përkthehet kjo në jetën e përditshme të tyre”.

“Procesi i Berlinit është një komponent i rëndësishëm, të cilin menjëherë pas fillimit të tij Partia Demokratike e ka mbështetur. PD ka mbështetur Procesin e Berlinit dhe gjithë rolin që ky proces do të ketë, por njëkohësisht dhe rritjen e rëndësisë për rajonin tonë, jo si një zëvendësues i procesit të integrimit, por si një element shtesë që na ndihmon. Ngritja e këtij Këshilli Kombëtar të Integrimit, rritja e rolit të Kuvendit, ngritja e strukturave negociuese nga njëra anë, por nga ana tjetër dhe rritja e rolit të parlamentit në këtë proces dhe dhënia e një dimensioni parlamentar të Procesit të Berlinit, kanë qenë disa elementë që na kanë shoqëruar vite e fundit”, tha ajo.

Tabaku tha se politika dhe qytetarët shqiptarë duan rezultate sot, i presin menjëherë, por ky proces veçse na teston durimin na i vendos rezultatet edhe në mënyrë sfiduese të shpërndara në kohë.

Në përfundim, Balla dhe Tabaku, duke marrë shkasë nga gjyqi që po zhvillohet sot në Hagë, shprehën mbështetjen për luftën e Ushtrisë Çlirimtare të Kosovës.