Më 2 shtator 2021, në aeroportin e Rinasit mbërritën 37 shtetas afganë, kryesisht gra dhe familjet e tyre.
Në Shqipëri, ato i sollën dy figura femërore politike, ndër më të lartat në historinë moderne të politikbërjes.
Një fondacion i themeluar nga Hillary Clinton dhe Madeleine Albright, me qëllim fuqizimin e rolit të gruas, e kanë bërë të mundur ardhjen e tyre në Tiranë, për t’i shpëtuar regjimit taleban.
Sipas medias arabe “Al Arabia”, një burim zyrtar për ta e ka pohuar faktin se dy zonjat me profil të lartë politik, kanë evakuuar gratë dhe familjarët e tyre nga Kabuli.
Ndër raportime, shkruhet edhe se ky fluturim, ka qenë shumë i vështirë për t’u organizuar.
Një pjesë e njerëzve që arritën të ngjiteshin në bord madje, kishin nevoja të menjëhershme për përkujdesje shëndetësore. Kjo, pas plagëve që kishin marrë në përballjen me turmën jashtë aeroportit të Kabulit.
Afganët erdhën pa bagazhe në Shqipëri, sepse trupat amerikane nuk i lejuan ata. Pritja në Kabul për disa ndërkaq, ka qenë prej ditësh.
Në tërësi, 644 afganë kanë mbërritur në Shqipëri. Një pjesë e madhe e tyre e kanë ndërmarrë udhëtimin nëpërmjet ndërmjetësimit të Organizatave jo Qeveritare.
Ndërsa, përtej implikimit të dy zonjave të politikës, nuk dihet nëse ato do të kenë mundësi për ndërhyrje të tjera të ngjashme.
Gjithsesi, ashtu si është konfirmuar edhe më parë, vendmbërritja përfundimtare e afganëve janë SHBA-të.
Sakaq, në Shqipëri, ata mendohet se mund të rrinë deri në një vit. Shpenzimet e tyre, do të mbulohen po nga OJF-të e ndryshme apo Qeveria amerikane. /Albanianpost.com
