Ministri i Bujqësisë dhe Zhvillimit Rural, Andis Salla, vizitoi Konispolin, rajoni kryesor i prodhimit dhe eksportit të mandarinave në Shqipëri.

Ministri së bashku me Kryetarin e Bashkisë Konispol, Ergest Dule, u takuan me fermerët dhe grumbulluesit për të adresuar shqetësimet që janë përhapur në medie mbi përdorimin e pesticideve të ndaluara nga Bashkimi Evropian apo nga lista e miratuar nga Ministria e Bujqësisë në mandarina.

Duke marrë fjalën ministri Salla konfirmoi se, “analizat nga laboratorë të certifikuar, brenda dhe jashtë vendit, konfirmojnë se nuk ka përdorim të pesticideve të palejuara, duke garantuar cilësinë e prodhimit tonë “Made in Albania””.

Ai shtoi se fermerët e Konispolit janë profesionistë të trajnuar dhe të pajisur me analiza nga laboratorë të certifikuar, brenda dhe jashtë vendit, të cilat konfirmojnë se nuk ka përdorim të pesticideve të palejuara, duke garantuar cilësinë e prodhimit vendas.

Ai theksoi gjithashtu se situata e krijuar lidhet me dinamikat ndërkombëtare të tregut, të ngjashme me ato që po përjetojnë edhe disa vende të Bashkimit Evropian. Ministria planifikon që nga fillimi i vitit të ardhshëm të nisë digjitalizimi i monitorimit të farmacive bujqësore, një hap i rëndësishëm për më shumë transparencë dhe kontroll.

Paralelisht, Salla njoftoi punën për ngritjen e Urdhrit të Agronomit, i cili do të forcojë gjithë zinxhirin bujqësor, duke përfshirë prodhuesit, tregun dhe grumbulluesit.

Ministria e Bujqësisë dhe Zhvillimit Rural mbetet e angazhuar në mbështetje të fermerëve dhe në mbrojtje të prodhimit vendas, duke garantuar standarde të larta cilësie dhe siguri për tregun vendas dhe eksportin.

Burimi ATSH