Gjatë vizitës zyrtare në Dubai, në kuadër të Samitit të Mikpritjes së Ardhshme, ministri i Turizmit, Kulturës dhe Sportit, Blendi Gonxhja, takoi Abdulla Bin Touq Al Marri, ministër i Ekonomisë i Emirateve të Bashkuara Arabe.

Abdulla Bin Touq Al Marri është një figurë që ka luajtur një rol kyç në transformimin ekonomik dhe turistik të vendit të tij.

Ministri Gonxhja beri të ditur se biseda mes tyre u përqendrua tek forcimi i bashkëpunimit dypalësh në fushat e turizmit, kulturës dhe sportit. Gjithashtu u fol dhe për shkëmbimin e përvojave që lidhen me zhvillimin e qëndrueshëm ekonomik dhe promovimin e inovacionit në sektorin e mikpritjes.

“Një takim që afirmon vullnetin e përbashkët për të zgjeruar partneritetin ekonomik e turistik mes dy vendeve, duke ndërtuar ura të reja bashkëpunimi në dobi të zhvillimit të qëndrueshëm dhe promovimit ndërkombëtar të Shqipërisë” është shprehur ministri i MTKS, Blendi Gonxhja.