Ministri i Turizmit, Kulturës dhe Sportit, Blendi Gonxhja zhvilloi një takim me kryetaren e Grupit të Punës për Turizmin në Dhomën e Tregtisë të Abu-Dabit, Shaikha Nasser Al Nowais.

Shaikha Al Nowais, e njohur si një lidere e shquar në fushën e turizmit dhe mikpritjes globale, ka një rol të rëndësishëm në nxitjen e zhvillimit të qëndrueshëm, inovacionit dhe rritjes gjithëpërfshirëse ekonomike. Si kryetare e grupit të punës për turizmin, ajo ka kontribuar në forcimin e bashkëpunimeve strategjike dhe promovimin e praktikave të qëndrueshme në rajon dhe në nivel ndërkombëtar.

E përzgjedhur për të marrë detyrën e Sekretares së Përgjithshme të Turizmit në “UN Tourism” duke filluar nga janari 2026, Al Nowais përfaqëson një vizion të ri global për zhvillimin e turizmit të qëndrueshëm dhe gjithëpërfshirës.

Takimi u fokusua në mundësitë për të riformësuar turizmin global përmes qëndrueshmërisë, inovacionit dhe përfshirjes ekonomike, si dhe në hapjen e rrugëve të reja të bashkëpunimit mes Shqipërisë dhe Emirateve të Bashkuara Arabe në fushën e turizmit.

Burimi ATSH