Eksportet e produkteve bujqësore shqiptare vijojnë të shënojnë rritje të qëndrueshme edhe gjatë vitit 2025.

Ministri i Bujqësisë dhe Zhvillimit Rural, Andis Salla, bëri të ditur se gjatë periudhës janar–gusht 2025, eksportet janë rritur me 9,1% krahasuar me të njëjtën periudhë të vitit të kaluar.

Sipas ministrit, ky progres është rezultat i politikave mbështetëse për fermerët, investimeve në rritjen e standardeve të prodhimit, si dhe përmirësimit të infrastrukturës dhe logjistikës në sektorin bujqësor.

“Rritja e vazhdueshme e eksporteve është një tregues i qartë i transformimit të bujqësisë, sipas vizionit tonë strategjik “Bujqësia2030” drejt një sektori më konkurrues, të qëndrueshëm dhe të integruar në tregjet evropiane”, theksoi Salla.

Ministri theksoi se, “ky trend pozitiv ndikon drejtpërdrejt në rritjen e të ardhurave për familjet rurale, në forcimin e zinxhirit të vlerës dhe në afrim të qëndrueshëm me objektivin ambicioz të vendosur nga qeveria: 1 miliard euro eksporte bujqësore deri në vitin 2030”.

Salla shprehu angazhimin e qeverisë për vijimin e mbështetjes për fermerët dhe agropërpunuesit, me synimin për të ruajtur këtë trend rritjeje dhe për të forcuar pozicionin e Shqipërisë si eksportuese e produkteve cilësore në tregjet ndërkombëtare.

Produktet tona bujqësore tashmë gjenden në 80 tregje elitare ndërkombëtare duke njohur konsumatorët me shijen dhe cilësinë unike të produkteve Made in Albania.

Burimi ATSH