Pas përfundimit të Unazës së Madhe vitin e kaluar, Tirana do të ketë edhe një bajpas strategjik jugor, projekt i cili po merr formë. Autoriteti Rrugor Shqiptar (ARRSH) ka shpallur tenderin për ndërtimin e kësaj rruge që pritet të lehtësojë trafikun në hyrje-dalje të kryeqytetit.

Bajpasi jugor do të ketë një gjatësi mbi 21 kilometra dhe do të lidhë zonën e Kasharit me atë të Mulletit, duke kaluar përgjatë luginës së Erzenit. Ky projekt do të shmangë qendrën e Tiranës, duke ofruar një alternativë më të shpejtë dhe më të rehatshme për qarkullimin e mjeteve.

“Do të jetë një autostradë interurbane e tipit ‘A’ me katër korsi, nga një korsi emergjence në secilën anë dhe dy bankina të asfaltuara. Gjithsej pjesa asfaltike do të ketë 22.4 metra gjerësi, me një shpejtësi lëvizjeje prej 110 km/h. Fondi total për ndërtimin e këtij projekti është 209 milionë euro, nga të cilat 81 milionë euro do të financohen nga qeveria shqiptare dhe pjesa tjetër nga BERZH”, tha Niko Mihali, përgjegjësi i Sektorit të Hartimit të Projekteve pranë ARRSH-së, në një prononcim për mediat.

Sipas Autoritetit Rrugor Shqiptar, projekti është konceptuar për të minimizuar ndikimin në komunitetet lokale dhe zonat e mbrojtura. Ai synon të përfundojë brenda 24 muajve nga nënshkrimi i kontratës.

Ky bajpas jo vetëm do të shërbejë si një rrugëdalje nga trafiku i rënduar i qytetit, por edhe si një korridor që afron Shqipërinë me standardet europiane të infrastrukturës.

Burimi ATSH