Ministri i Shtetit për Marrëdhëniet me Parlamentin, Taulant Balla mori pjesë në ceremoninë e 100-vjetorit të themelimit të Fondacionit Friedrich Ebert Stiftung (FES), ku mbajti një fjalë përshëndetëse me vlerësime për rolin e fondacionit dhe partneritetin me Shqipërinë.

“Mirënjohje Fondacionit “Friedrich Ebert” për bashkëpunimin shumëvjeçar, veçanërisht në fushat e demokracisë, partive politike, shtetit të së drejtës, integrimit evropian, politikave sociale, fuqizimit të të rinjve dhe pjesëmarrjes qytetare, barazisë gjinore si dhe sigurisë dhe bashkëpunimit rajonal”, u shpreh Balla.

Ministri tha se ndihet i nderuar që merr pjesë në festën për një shekull përkushtim të FES ndaj vlerave demokratike, drejtësisë sociale dhe angazhimit progresist.

Balla, duke cituar Friedrich Ebert tha se, “Liria dhe drejtësia janë motra binjake”.

Balla theksoi edhe marrëdhënien e gjatë dhe domethënëse që Partia Socialiste dhe Shqipëria kanë pasur me Fondacionin Friedrich Ebert, duke falënderuar edhe qeverinë gjermane për mbështetjen e vazhdueshme në fusha të rëndësishme për zhvillimin e vendit.

“Gjermania mbetet partneri ynë më i rëndësishëm, veçanërisht përmes bashkëpunimit me KfW-në, në projekte jetike si kanalizimet, furnizimi me ujë, energjia elektrike dhe shumë të tjera”, theksoi ministri, duke nënvizuar rëndësinë e mbështetjes së partnerëve gjermanë në forcimin e infrastrukturës dhe mirëqenies në vend.

Në fund të fjalës së tij, Balla përcolli përshëndetjet për presidentin e FES, Martin Schulz, të cilin e cilësoi “një mik të madh të Shqipërisë”.

Ai shprehu gjithashtu mirënjohje për gjithë familjen e fondacioneve politike gjermane që veprojnë në Shqipëri, përfshirë Konrad-Adenauer, Hanns-Seidel, Heinrich-Böll dhe Rosa-Luxemburg, për kontributin e tyre në forcimin e demokracisë, edukimit qytetar dhe zhvillimit të qëndrueshëm.

Burimi ATSH