Me rastin e vizitës shtetërore të presidentit kinez Xi Jinping në Kamboxhia, të enjten u zhvilluan në Pnom Pen një varg aktivitetesh të shkëmbimeve kulturore ndërmjet Kinës dhe Kamboxhias, të organizuara bashkërisht nga Grupi Mediatik i Kinës (CMG), Ministria e Informacionit e Kamboxhias, Ministria e Kulturës dhe e Arteve e Kamboxhias, Ministria e Turizmit e Kamboxhias, si edhe Akademia Mbretërore e Kamboxhias.

Foto nga CMG

Aktivitetet përfshijnë nisjen e mekanizmit të partneritetit mediatik Kinë-Kamboxhia, transmetimin e programeve për shkëmbimet ndërmjet qytetërimeve Kinë-Kamboxhia, si edhe edicionin e dhjetë të aktivitetit “Kinemaja në natyrë”. CMG-ja dhe shumë institucione qeveritare e media të Kamboxhias kanë nënshkruar një sërë dokumentesh të bashkëpunimit pragmatik. Kryetari i Partisë Popullore Kamboxhiane dhe kryetari i Senatit të Kamboxhias, Hun Sen, dërgoi një mesazh urimi, duke përgëzuar për arritjen e rezultateve të frytshme gjatë këtyre aktiviteteve. Në to ishin të pranishëm afro 200 të ftuar nga fusha politike, ekonomike, kulturore, akademike dhe mediatike të të dy vendeve.

Foto nga CMG

Në mesazhin e tij të urimit, Hun Sen tha se miqësia ndërmjet Kinës dhe Kamboxhias ka kaluar sprovat e kohës e të historisë, dhe Kina është vendi mik më i besueshëm i Kamboxhias. Ai theksoi se shkëmbimet kulturore janë një lidhje e rëndësishme mes popujve të dy vendeve dhe shprehu kënaqësinë për arritjet e bashkëpunimit mediatik kino-kamboxhian, përfshirë “Kanalin e Miqësisë Kinë-Kamboxhia”. Ai shprehu besimin që këto aktivitete do të krijojnë edhe një herë një urë për të thelluar kuptimin dhe për të rritur besimin e ndërsjellë mes dy vendeve, duke i çuar përpara në mënyrë të qëndrueshme marrëdhëniet dypalëshe.

Foto nga CMG

Presidenti i CMG-së Shen Haixiong u shpreh se CMG-ja ka qenë gjithmonë e angazhuar për promovimin e shkëmbimeve kulturore ndërmjet Kinës e Kamboxhias dhe për forcimin e miqësisë ndërmjet popujve të të dy vendeve. “Kanali i Miqësisë Kinë-Kamboxhia” ka funksionuar për më shumë se dhjetë vjet dhe është bërë një markë simbol e bashkëpunimit mediatik ndërmjet dy vendeve. Aktiviteti “Kinemaja në natyrë” ka udhëtuar nëpër 25 provinca dhe qytete të Kamboxhias gjatë 10 vjetëve të fundit, duke u bërë një kartëvizitë e shkëlqyer e shkëmbimeve kulturore ndërmjet dy vendeve. Programet cilësore të CMG-së, si “Xi Jinping-u kujdeset për thesaret e kulturës kineze” dhe “Kina në art”, të transmetuara kohët e fundit në mediat kryesore të Kamboxhias, si Televizioni Kombëtar i Kamboxhias, kanë marrë reagime pozitive dhe vlerësime të gjëra. Me rastin e vizitës së presidentit Xi, CMG-ja ka nisur një raund të ri të bashkëpunimit në fushën e shkëmbimeve kulturore me Kamboxhian, “duke kënduar këngën e miqësisë”, duke kontribuuar në riformësimin e sistemit të diskursit ndërkombëtar, duke shtuar konsensusin për paqe e zhvillim dhe duke forcuar zërin e vendeve të Jugut Global në arenën e opinionit publik ndërkombëtar.

Burimi CGTN