Kryeministri, njëherazi kryetari i Partisë Socialiste, Edi Rama deklaroi sot se Durrësi do të shndërrohet në një destinacion të një kompleksi akademish sportive.

Gjatë takimit të mbajtur në Tiranë, ku kreu i PS-së paraqiti vizionin e forcës politike që ai drejton për sportin, Rama tha janë hedhur themelet që kanë munguar për shumë e shumë vite, pasi u hodhën në erë një herë e një kohë dhe pasi sporti u abandonua plotësisht.

Kryeministri informoi se shumë shpejt do të ngrihet infrastruktura dhe Akademia e Manchester City-t në Durrës.

“Nëse sot kemi këtu një shembull që nuk mund të imagjinohej disa vite më parë të fëmijëve që mësojnë të luajnë në skuadër, në një nga shkollat më të famshme të futbollit që është shkolla e Manchester City-t, shumë shpejt do të kemi të gjithë infrastrukturën e Akademisë dhe shkollës në Durrës, ku ashtu siç e kemi biseduar me pronarët dhe drejtuesit teknik të Manchester City-t, do të krijojmë një destinacion rajonal për të gjithë talentet e futbollit”, tha Rama.

Kryeministri foli dhe për mundësinë e vendosjes po në Durrës të Akademisë së Tenisit të Rafael Nadal.

“Jemi duke hedhur hapa për Akademinë e Tenisit të Rafael Nadal, po në Durrës”, shtoi ai.

Njëkohësisht kryeministri deklaroi se kanë filluar diskutimet me NBN për Akademinë e NBN.

“NBN do të bëjë një akademi në rajon dhe iu pëlqen që akademia të vendoset në Shqipëri. Kanë parë edhe zonën atje”, informoi Rama.