Filmi “The Ring”, vepër e regjisorit dhe aktorit të mirënjohur izraelit Adir Miller u shfaq për herë të parë në Tiranë.

Në shfaqjen e filmit ishte i pranishëm ministri i Ekonomisë, Kulturës dhe Inovacionit, Blendi Gonxhja me ftesë të Ambasadores së Izraelit në Shqipëri, Galit Peleg.

Ky film u shfaq si një bashkëpunim me MEKI, vetëm pak ditë para 80-vjetorit të çlirimit të ish-kampit nazist të Aushvicit dhe në Ditën Ndërkombëtare të Përkujtimit të Viktimave të Holokaustit.

“Shqipëria ka luajtur një rol të rëndësishëm në mikpritjen dhe Besën e dhënë për shpëtimin e hebrenjve gjatë Luftës së Dytë Botërore, duke hapur dyert e saj dhe duke u kthyer në një strehë mbrojtëse në momentet më të vështira për ta”, tha Gonxhja.

Ministri Gonxhja u shpreh se “në një botë ku historia herë harrohet e herë keqkuptohet, arti dhe filmat na ndihmojnë të reflektojmë për të kaluarën e përbashkët dhe të përcjellim kujtesën e mësimet përjetë ndër breza”.

“Iniciativa të tilla shërbejnë si ura lidhëse mes kulturave tona dhe forcojnë më tej miqësinë mes popujve tanë, duke promovuar traditat dhe vlerat tona njerëzore”, tha Gonxhja.

Filmi tregon një histori të vërtetë e të dhimbshme, nga një këndvështrim krejt i pazakontë rrëfimi, realist, prekës por dhe shumë aktual, që e bën unik krijimin e komedianit Adir Miller.

Regjisori Adir Miller, që luan rolin kryesor në film, është frymëzuar nga historia e nënës së tij, Marian Miller, një e mbijetuar e Holokaustit.

Filmi “The Ring” “Unaza” i xhiruar në Izrael dhe Hungari, rikrijon Europën e viteve 1940, duke ndërthurur me mjeshtëri narrativat personale dhe historike. Ndërsa shëndeti i nënës së tij përkeqësohet, protagonisti nis një udhëtim emocional në vendlindjen e saj në Budapest në kërkim të unazës që dikur i shpëtoi jetën. Filmi ka pasur premierën e tij më parë në Tel Aviv në Izrael, por gjatë këtij muaji në ditët e fundit pritet të shfaqet edhe në Nju Jork në SHBA.