Ministrja e Shtetit për Rininë dhe Fëmijët, Bora Muzhaqi tha sot se ka nisur procesi i Shkëmbimit Rinor me këshillat vendore rinorë të jugut. I gjithë ky bashkërendim synon angazhimin e të rinjve në vendimmarrjen lokale, përmes ideve dhe vizionit të tyre.

“Me pjesëmarrjen e mbi 20 Këshillave Vendorë Rinorë, përfaqësuar nga 50 të rinj plot motivim dhe ide, të rinjtë zhvilluan takime informuese me ekipin e rinisë dhe trajnerë të ndryshëm, si dhe zhvilluan një bisedë frymëzuese me kryetarin e bashkisë së Elbasanit, qytetit pritës, Gledjan Llatja. Të rinjtë diskutuan gjithashtu mbi aspektet ligjore të funksionimit të KVR-ve dhe aktivizmin qytetar të të rinjve në nivel lokal. Synimi ynë është të fuqizojmë të rinjtë dhe për t’i angazhuar më shumë në vendimmarrjen lokale, duke prezantuar idetë dhe vizionin e tyre”, u shpreh Muzhaqi.

Buxheti për rininë është rritur me 54% krahasuar me vitin e kaluar, ndërsa ministrja Muzhaqi është shprehur se ky buxhet synon fuqizimin e të rinjve shqiptarë përmes programeve gjithëpërfshirëse që janë parashikuar gjatë vitit të ardhshëm.

Në projektbuxhetin e vitit 2025 janë planifikuar 333 milionë lekë, të cilat do të shkojnë në mbështetje të drejtpërdrejtë për të rinjtë, krahas dhe investimeve të tjera indirekte për rininë. Pjesa më thelbësore e këtyre shpenzimeve shkon për financimin e organizatave rinore dhe për të rinjtë nëpërmjet thirrjes vjetore për mbështetje me fonde grant për shoqërinë civile, me qëllim fuqizimin, trajnimin dhe përgatitjen e të rinjve për tregun e punës.

Programe të tjera që realizohen përmes këtij buxheti përfshijnë zbatimin e strategjisë kombëtare të rinisë nëpërmjet programit të ri të praktikave të punës, programit të të rinjve të talentuar, dhe programit të nismave komunitare të drejtuara nga të rinjtë, si dhe aktivitete që kanë si qëllim edukimin joformal si shkolla verore për të rinjtë e këshillave vendorë rinorë dhe këshillin kombëtar rinor, shkolla dimërore për punonjësit rinor.

(ATSH)