Presidenti Bajram Begaj mori pjesë sot në panairin ndërkombëtar të bujqësisë në Lushnjë, të cilin e konsideroi tregues të partneritetit të prodhuesve shqiptarë me ata të huaj, si dhe arritje të konkurrueshmërisë së produkteve tona në tregjet ndërkombëtare.

Begaj bisedoi me fermerë, blegtorë dhe sipërmarrës për nxitjen e mëtejshme të bashkëpunimit mes tyre dhe aktorëve kryesorë të këtij sektori, me synim zhvillimin e bujqësisë edhe ruajtjen e cilësisë dhe sigurisë së produkteve.

”Produktet bujqësore Made in Albania duhet të jenë edhe krenari kombëtare. I kemi të gjitha mundësitë. Tashmë, duhet vendosmëri për të vijuar punën e nisur dhe dashuri për këtë tokë”, theksoi Begaj.

Presidenti Begaj vlerësoi faktin që Lushnja është zgjedhur këtë vit mikpritëse e dhjetëra bizneseve bujqësore dhe prodhuese shqiptare e ndërkombëtare.

Duke theksuar rëndësinë e bujqësisë për ekonominë shqiptare, mirëqenien dhe punësimin, Begaj tha se krahas strategjisë afatgjatë, duhet të aplikohen skema dinamike që ofrojnë zgjidhje përballë sfidave të kohës, ku më emergjente është lëvizja demografike dhe emigracioni.

”Largimi nga fshati nuk vjen nga joshja e dritave të qytetit, brenda apo jashtë vendit, por nga pamundësia për një mënyrë jetese që sjell jo vetëm arritje personale, por kontribuon edhe në mirëqenien e shoqërisë”, u shpreh Begaj.

Në këtë kontekst, Presidenti Begaj shprehu mirënjohje për ekspertët e bujqësisë dhe për ata shqiptarë që pas emigracionit u janë rikthyer tokave, një rol të cilin e vlerësoi si patriotik, duke garantuar mbështetjen e tij për fuqizimin e sipërmarrjeve private, në mënyrë që mundi i fermerit dhe blegtorit të shpërblehet.

Kreu i Shtetit veç vizitës në stendat e panairit në Lushnjë shkoi edhe në fermën e Grames, të pajisur me teknikat e reja të kultivimit të perimeve në serra, nga ku u shpreh se përmes investimeve të tilla arrihet përmirësimi i standardeve të prodhimit dhe zhvillimi i ekonomisë rurale.