I Ngarkuari me Punë i Ambasadës së Kinës në Shqipëri, Wang Dexin, vizitoi VasGroup dhe pati shkëmbime mendimesh me Enver Mehmeti, themelues i kompanisë, për bashkëpunimin në fushën e turizmit midis Kinës dhe Shqipërisë.

Sipas njoftimit të ambasadës, I Ngarkuari me Punë, Wang tha se, Shqipëria është e pasur me burime turistike natyrore dhe kulturore dhe industria e turizmit është zhvilluar me shpejtësi vitet e fundit, me një rritje të ndjeshme të numrit të turistëve të huaj.

“Pas pandemisë së COVID-19, tregu i turizmit në Kinë po rimëkëmbet gradualisht dhe tregu i udhëtimit jashtë Kinës ka një potencial të madh. Brezat e vjetër të kinezëve, në veçanti, janë thellësisht të impresionuar nga miqësia tradicionale midis Kinës dhe Shqipërisë. Shpresojmë që sipërmarrjet turistike të dy vendeve të forcojnë bashkëpunimin dhe të krijojnë më shumë itinerare turistike të veçanta për të tërhequr më shumë turistë kinezë në Shqipëri. Në të njëjtën kohë presim edhe më shumë turistë shqiptarë të vizitojnë Kinën”, shkruan ambasada në njoftimine saj në Facebook.