Roli i Gjykatave Kushtetuese në mbrojtjen e të drejtave themelore dhe forcimin e shtetit të së drejtës ishte në qendër të një konference shkencore të zhvilluar sot në Prishtinë, me pjesëmarrjen e studiuesve dhe përfaqësuesve institucionalë nga Kosova, Shqipëria dhe Maqedonia e Veriut.

Konferenca me temë “Roli i Gjykatës Kushtetuese në Republikën e Kosovës dhe në Republikën e Shqipërisë: Perspektivë krahasuese” u organizua nga Akademia e Shkencave dhe e Arteve e Kosovës, në bashkëpunim me Akademinë e Shkencave të Shqipërisë.

Në emër të Akademisë së Shkencave të Shqipërisë, sekretarja shkencore, akademike Anila Hoda, vlerësoi rëndësinë e diskutimit mbi drejtësinë kushtetuese, duke theksuar se gjykatat kushtetuese kanë rol themelor në garantimin e respektimit të Kushtetutës, mbrojtjen e lirive dhe të drejtave të qytetarëve dhe ruajtjen e ekuilibrit ndërmjet pushteteve.

Burimi ATSH