Kryeministri Edi Rama deklaroi sot se 10 vjet pas miratimit të reformës në drejtësi u shemb kulti 100-vjeçar i pandëshkueshmërisë.

Në fjalën e tij në prezantimin e Paketës së Re të Garancive në Kodin e Procedurës Penale, Rama tha se “tamam 10 vjet më parë në vitin 2016 Kuvendi i Shqipërisë ktheu në akt aspiratën më të guximshme të programit tonë për një rilindje shqiptare”.

“Ndryshuam kushtetutën dhe ligjëruam çlirimin e drejtësisë nga pushteti politik pas një varësie kronike që kishte zgjatur qysh nga dita e themelimit të shtetit shqiptar në vitin 1912”, u shpreh Kryeministri.

Sipas tij, reforma në drejtësi e shembi ngrehinën e vjetër të pushtetit gjyqësor dhe ngriti një arkitekturë krejt të re.

“Ajo krijoi institucione të reja të vetëqeverisjes së gjyqësorit, një superstrukturë të posaçme për luftën kundër krimit të organizuar dhe korrupsionit, një sistem pagash më të larta se maja e piramidës shtetërore dhe një proces unik vetingu si themel të rrugës së re të drejtësisë shqiptare”, vuri në dukje Rama.

“Sot pas 10 vjetësh kemi parë, dëgjuar dhe mësuar shumë. Kemi parë forcën e reformës, por dhe dobësitë që dolën nga përballja me realitetin. Kemi parë rezultate që dikur dukeshin jo të pamundura, po as nuk imagjinoheshin dot, por kemi parë dhe dështime dhe deformime që nuk mund të fshihen pas rezultateve”, nënvizoi Rama.

Megjithatë, vijoi Kryeministri, përtej çdo vështirësie dhe peripecie, barra e kthesës së madhe përmes reformës në drejtësi ia ka vlejtur të gjithë qiranë kur i thonë fjalës.

“Një fjali për të gjitha të mirat e kësaj reforme. Sa brutale aq edhe dobiprurëse. 10 vjet më parë ne i dorëzuam pushtetin gjyqësor shpatën e ndëshkimit, e cila për 100 vjet kishte qëndruar në dorën e pushtetit politik”, tha Rama.

Sot, shtoi Kryeministri, duam të bëjmë një hap tjetër, tjetër më modest në përmasa, por jo më pak kuptimplotë në qëllim.

Kreu i qeverisë tha se “duam t’i japim më shumë ekuilibër peshores së drejtësisë në mënyrë që pushteti gjyqësor të mos bëjë asnjëherë ligjin mbi drejtësinë, po drejtësia të jetë gjithnjë fuqia e barazisë së të gjithëve përpara ligjit”.

“Ky është thelbi i paketës së re që prezantojmë sot publikisht dhe që vetë bashkautorët e saj shumë të nderuar e kanë quajtur paketa e garancive proceduriale”, tha Rama.

Burimi ATSH