Bordi Ekzekutiv i Programit të Kombeve të Bashkuara për Zhvillim (UNDP) ka miratuar Programin e ri për Shqipërinë 2027–2031, një kuadër pesëvjeçar që synon të mbështesë zhvillimin e vendit, përshpejtimin e reformave dhe avancimin e procesit të integrimit në Bashkimin Evropian.

Në një njoftim për shtyp UNDP bën të ditur se, programi do të përqendrohet në tri drejtime kryesore: zhvillimin gjithëpërfshirës të kapitalit njerëzor, transformimin ekonomik të qëndrueshëm dhe rritjen e gjelbër, si dhe forcimin e qeverisjes, drejtësisë dhe të drejtave të njeriut.

Një nga prioritetet është krijimi i më shumë mundësive për qytetarët përmes forcimit të shërbimeve sociale dhe të punësimit, arsimit profesional dhe zhvillimit të aftësive të reja. Në fokus do të jenë veçanërisht të rinjtë, gratë dhe personat me aftësi të kufizuara, ndërsa do të investohet edhe në aftësitë digjitale, inteligjencën artificiale dhe formimin profesional.

Programi parashikon gjithashtu mbështetje për ndërmarrjet e vogla dhe të mesme, me synim rritjen e inovacionit, përdorimin e teknologjive të reja dhe përmirësimin e aksesit në tregjet rajonale dhe evropiane. Kjo lidhet drejtpërdrejt me krijimin e mundësive të reja ekonomike dhe të punësimit.

Një tjetër komponent është zhvillimi i një ekonomie më të gjelbër dhe rezistente ndaj ndryshimeve klimatike. UNDP do të mbështesë Shqipërinë në mbrojtjen e biodiversitetit, menaxhimin e burimeve natyrore, zhvillimin e rrjetit “Natura 2000”, përballimin e rreziqeve nga fatkeqësitë dhe përshtatjen ndaj ndryshimeve klimatike.

Programi do të mbështesë edhe forcimin e institucioneve, reformën në drejtësi, luftën kundër korrupsionit dhe përmirësimin e menaxhimit të financave publike, në funksion të përafrimit të mëtejshëm me standardet e Bashkimit Evropian.

Në nivel vendor, UNDP do të punojë për forcimin e kapaciteteve të bashkive dhe për rritjen e mundësive që qytetarët të marrin pjesë në proceset vendimmarrëse. Mbështetje parashikohet edhe për ndihmën juridike falas dhe institucionet e pavarura të mbikëqyrjes.

Programi i ri është hartuar pas një procesi të gjerë konsultimi me më shumë se 600 grupe interesi, ku përfshihen institucionet publike, shoqëria civile, sektori privat, akademia, media dhe grupet e cenueshme. Konsultimi online ka marrë gjithashtu më shumë se 1000 përgjigje.

Sipas UNDP-së, objektivi është që zhvillimi të sjellë përfitime më të drejtpërdrejta për qytetarët dhe veçanërisht për grupet që rrezikojnë të mbeten pas, duke kontribuar njëkohësisht në përmbushjen e Objektivave të Zhvillimit të Qëndrueshëm dhe në prioritetet kombëtare të Shqipërisë për zhvillim dhe integrim evropian.

Marrë nga ATSH