Prej 1 shtatorit ka hyrë në fuqi rregullorja e re e Gjykatës së Posaçme të Shkallës së Parë Kundër Korrupsionit dhe Krimit të Organizuar (GJKKO), që parashikon heqjen e telefonave dhe kamerave për gazetarët e pranishëm në seanca.

Delegacioni i Bashkimit Evropian në Shqipëri ka reaguar lidhur me këtë situatë, duke bërë të ditur se po e monitoron nga afër situatën.

Në një përgjigje për Top Channel, delegacioni i BE-së shprehet se është në dijeni të rregullores së re të brendshme për sigurinë, rendin dhe rregullat e sjelljes në ambientet e GJKKO-së, e cila, merr parasysh karakteristikat e veçanta organizative, operacionale dhe të sigurisë që lidhen me këtë gjykatë dhe proceset e saj gjyqësore.

“BE-ja është e gatshme të vijojë të ofrojë ekspertizë të specializuar si për sistemin gjyqësor, ashtu edhe për komunitetin mediatik, në mbështetje të gjetjes së një ekuilibri të drejtë ndërmjet masave të sigurisë dhe aksesit në informacion dhe transparencës së proceseve gjyqësore, në përputhje me standardet dhe parimet evropiane”, thuhet në përgjigje.

Delegacioni i BE-së thekson se do të vijojë t’i monitorojë nga afër këto çështje në kuadër të negociatave të anëtarësimit të Shqipërisë në Bashkimin Evropian.

Ndërkohë, kreu i Dhomës Kombëtare të Avokatisë, Maksim Haxhia, ka njoftuar se të martën, në orën 12:00, do të zhvillohet në Tiranë një mbledhje urgjente për të diskutuar kufizimet që, sipas avokatëve, parashikon rregullorja e re.

Në debat është përfshirë edhe komuniteti mediatik. “Safe Journalist” ka kërkuar publikisht rishikimin e rregullores, duke shprehur shqetësimin se disa prej parashikimeve të saj mund të cenojnë punën e gazetarëve dhe të medias në raport me proceset gjyqësore.

Rregullorja e re ka hapur kështu një debat mbi balancën mes nevojave për siguri në mjediset e GJKKO-së dhe garantimit të aksesit të avokatëve, gazetarëve dhe publikut në informacion dhe në proceset gjyqësore.

Marrë nga ATSH