Ambasadorja e re e Bashkimit Evropian në Shqipëri, Sofia Moreira de Sousa, ka nisur zyrtarisht misionin në Tiranë me një mesazh, duke vënë theksin te mbështetja e procesit të integrimit evropian të vendit tonë.

Në një videomesazh të publikuar nga Tirana, Moreira de Sousa shprehet se është një nder të shërbejë në Shqipëri në një moment të rëndësishëm për rrugëtimin e vendit drejt Bashkimit Evropian.

“Së bashku me ekipin tim në Delegacionin e Bashkimit Evropian jam këtu për të mbështetur çdo hap të shqiptarëve drejt integrimit në Bashkimin Evropian”, shprehet ambasadorja.

Ajo thekson se gjatë mandatit të saj do të punojë në koordinim të ngushtë me shtetet anëtare të BE-së, si dhe me partnerët dhe aktorët e tjerë, në funksion të objektivit të përbashkët të integrimit evropian të Shqipërisë.

“Gjatë katër viteve të ardhshme të misionit tim në këtë vend të bukur dhe mikpritës, mund të mbështeteni në angazhimin tim absolut për të ndërtuar së bashku të ardhmen evropiane të shqiptarëve”, deklaron Moreira de Sousa.

Ambasadorja e re e BE-së vlerëson njëherësh edhe mikpritjen shqiptare, duke shprehur dëshirën për të udhëtuar në të gjithë vendin dhe për ta njohur nga afër Shqipërinë dhe qytetarët e saj.

“Kam dëgjuar shumë për mikpritjen e popullit shqiptar, mezi pres të udhëtoj në mbarë vendin për ta përjetuar vetë”, vijoi ajo.

“Mirupafshim!”, është përshëndetja në shqip e ambasadores së BE në Tiranë, duke nënvizuar angazhimin e saj për forcimin e bashkëpunimit dhe mbështetjen e mëtejshme të rrugës evropiane të Shqipërisë drejt të ardhmes evropiane.

Marrë nga ATSH