Zëvendëskryeministrja Albana Koçiu vuri në dukje katër shtyllat e platformës strategjike BESA, pas mbledhjes së zgjeruar të kabinetit qeveritar në Pogradec, drejtuar nga Kryeministri Edi Rama.

Me anë të një postimi në rrjetet sociale Koçiu u shpreh se skuadra “Shqipëria 2030” vijon punën në kuadër të përgatitjeve për sezonin e ri politik.

“BESA është B – Besim në rrugën e përbashkët për të bërë më të mirën për Shqipërinë dhe shqiptarët. E – Empati për të dëgjuar, për të kuptuar dhe për t’iu përgjigjur nevojave të çdo qytetari të këtij vendi. S – Shërbime që ndihen në jetën e përditshme, në çdo qytet, në çdo fshat, në çdo komunitet. A – Angazhim çdo ditë për të çuar përpara Shqipërinë drejt Bashkimit Europian”, shkruan Koçiu.

Ajo thekson se objektivi mbetet një Shqipëri europiane, me punën e përditshme të fokusuar te qytetarët dhe nevojat e tyre.

“Vazhdojmë punën, pranë qytetarëve, me sytë nga e ardhmja dhe me bindjen se Shqipëria europiane do të jetë pasqyrë e asaj që bëjmë çdo ditë, së bashku”, shkruan Koçiu.

Marrë nga ATSH