Zëvendëskryeministrja Albana Koçiu ka ndarë sot pamje nga punimet për zgjerimin e superstradës Tiranë–Durrës, një prej akseve kryesore rrugore të vendit.

Sipas Koçiut, punimet për Fazën III të zgjerimit po vijojnë me ritme të larta, me synim transformimin e një prej korridoreve më të rëndësishme të qarkullimit në një infrastrukturë moderne dhe me standarde europiane.

Investimi synon përmirësimin e qarkullimit dhe rritjen e sigurisë rrugore, ndërsa pritet të ndikojë edhe në zhvillimin e zonave përgjatë aksit Tiranë–Durrës.

Njëkohësisht, kanë përfunduar përpara afatit punimet për montimin e trarëve metalikë të mbikalimit të ri në Kashar, duke mundësuar vijimin normal të qarkullimit në aksin Tiranë–Durrës.

Koçiu e cilësoi investimin si pjesë të punëve dhe investimeve konkrete në infrastrukturën e vendit, duke e lidhur atë me objektivin e Shqipërisë drejt vitit 2030 dhe integrimit europian.

Superstrada Tiranë–Durrës përbën një nga akset më të rëndësishme të transportit në vend, për shkak të fluksit të lartë të automjeteve dhe lidhjes që krijon mes kryeqytetit dhe qytetit bregdetar.

Burimi ATSH