Në Krutje të Lushnjës, “ADEK FRUCHT” është një Shoqëri Bashkëpunimi Bujqësor që e ka nisur aktivitetin në vitin 2019, me një sipërfaqe prej vetëm 1 hektar, ndërsa sot është ndër eksportuesit kryesorë të kajsive “Made in Albania” drejt tregut italian.

Kryeministri Edi Rama ndau sot shembullin e kësaj sipërmarrjeje, e cila sipas tij dëshmon potencialin e bujqësisë shqiptare.

Administratori i kompanisë, Armelin Meta tregon rrugëtimin dhe zhvillimin e aktivitetit, si edhe rëndësinë e mbështetjes për fermerët dhe sipërmarrjet bujqësore.

“Ne kemi nisur biznesin tonë në bujqësi në vitin 2019 me rreth 1 hektar manaferra. Më pas, filluam me kultivimin e kajsisë, të kontraktuar me kompani italiane dhe për pjesën e shitjes. Aktualisht kemi rreth 8 hektarë tokë dhe rreth 12 hektarë kajsi të kultivuara, duke shpresuar për rritjen e biznesit edhe me ndihmën e AZHBR-së për të bërë plantacionet e reja”, u shpreh ai.

Meta vlerësoi po ashtu se masa 10% e rimbursimit nga AZHBR e ka ndihmuar shumë.

“Kjo ishte një masë shumë e mirë e marrë nga AZHBR-ja, kështu që shpresojmë edhe për më vonë që të kemi mbështetjen e AZHBR-së për rritjen e biznesit tonë”, u shpreh ai.

Marrë nga ATSH