Në fshatin Boshanj të Kolonjës vijon monitorimi i situatës fitosanitare në terren dhe kontrolli i vatrave të karkalecit në sipërfaqet bujqësore.

Ministri i Bujqësisë dhe Zhvillimit Rural, Andis Salla tha sot se “ndërhyrjet e para kanë nisur që në muajin maj, me trajtime të kryera në vatrat e identifikuara, duke përdorur preparate të autorizuara për mbrojtjen e kulturave bujqësore dhe kufizimin e përhapjes së dëmtuesit”.

Salla informoi se monitorimi do të vijojë deri në përfundimin natyror të tij.

“Duke qenë se karkaleci ndodhet tashmë në fazën e fundit të ciklit biologjik, monitorimi do të vijojë deri në përfundimin natyror të tij, me qëllim vlerësimin e situatës në terren dhe ndërhyrjen e menjëhershme në rast të identifikimit të vatrave të reja, duke garantuar mbrojtjen sa më efektive të prodhimit bujqësor”, nënvizoi Salla.

Ministri Salla u shpreh se “nërkohë, po ndiqen nga afër edhe ndërhyrjet në zonën e Maliqit, ku teknologjia e dronëve po përdoret për trajtimin e sipërfaqeve të misrit të prekura nga Diabrotika (rrënjëngrënësi i misrit), një masë që synon të minimizojë dëmet dhe të mbrojë rendimentin e kulturës”.

Banorët e fshatit Boshanj në Kolonjë ditët e fundit kanë ngritur shqetësimin për dëmet e mëdha në bujqësi të shkaktuara nga kolonitë e karkalecave, duke kërkuar ndërhyrje të menjëhershme nga institucionet përgjegjëse. Karkalecat kanë dëmtuar kultura të ndryshme bujqësore, ndërsa rrezikohen edhe vreshtat dhe plantacionet e lajthisë.

Marrë nga ATSH