Kryeministri Edi Rama, iu përgjigj sot zërave të partive opozitare për mosreagim në lidhje me deklaratën e ministres serbe për Administratën Shtetërore dhe Vetëqeverisjen Lokale, Snezhana Paunoviç, për spastrimin etnik në Kosovë.

Përmes një postimi në rrjetet sociale, kreu i qeverisë thekson se “ideja se çdo njeri që ka një zë publik, çdo institucion dhe autoritet, u dashka të reagojë për çdo idiotësi të thënë në serbisht, deri edhe nga personazhe që sa pa e thënë idiotësinë vetëm familja e tyre e dinte se ekzistonin, është një ide që tregon se sa pak e respektojnë veten dhe vendin ata që vënë kujën e që kërkojnë edhe hesap pse nuk reagon ky e ai!”.

Sipas Ramës, qeveria ka reaguar përmes deklaratave zyrtare nga nga ministri për Evropën dhe Punët e Jashtme, Ferit Hoxha, i cili ka dënuar deklaratën e ministers serbe.

“Ne kemi reaguar përmes ministrit të jashtëm, siç bën një shtet që ka respekt për veten dhe kush kërkon nga ne që të bëhemi kor histerik sa herë del një çyryk në Beograd e flet përçart, ka ngatërruar adresë”, theksoi kreu i Qeverisë.

“Mjafton të shikosh reaguesit e rastit nga Tirana, se si gjejnë një kalë të ngordhur për të marrë poza luftëtarësh në front dhe e kupton menjëherë pse kategoria e tyre meriton vetëm keqardhjen e radhës, ndërkohë që po deshe të mbash ijet me dorë duhet edhe të gjesh kohë t’i lexosh”, shkruan kryeministri Edi Rama.

Marrë nga ATSH