Ditën e sotme në Strasburg në mbledhjen e Komitetit Parlamentar të Stabilizim-Asociimit Shqipëri–Bashkimi Evropian, deputetët e Partisë Socialiste dhe të gjithë eurodeputetët votuan pro rekomandimeve në mbështetje të anëtarësimit të Shqipërisë në BE.

Kryeministri Edi Rama reagoi pas votimit, teksa theksoi se “të gjithë europarlamentarët, edhe ndonjë aty që erdhi e protestoi në Shqipëri, votuan pro Shqipërisë së bashku me parlamentarët e Partisë Socialiste. Sepse Shqipëria nuk ndalet!”.

Sipas kreut të qeverisë, ndryshe vepruan përfaqësuesit e opozitës të cilët votuan kundër dhe më pas u larguan për të dalë në fotoprotestë.

“Ndërsa parlamentarët e pakicës në Shqipëri, votuan kundër dhe ikën për të dalë në fotoprotestë. Sepse Partia Socialiste nuk ndalet”, shkruan Rama.

Partia Socialiste bëri sot të ditur se një numër amendamentesh të propozuara nga Partia Demokratike u mbështetën dhe u votuan edhe nga përfaqësuesit e Partisë Socialiste, pikërisht në frymën konsensuale që duhet të karakterizojë një proces kaq të rëndësishëm sa anëtarësimi i Shqipërisë në Bashkimin Europian.

Burimi ATSH