Ministri i Mbrojtjes, Ermal Nufi, uroi sot Shtetet e Bashkuara të Amerikës me rastin e 250-vjetorit të Pavarësisë, duke vlerësuar rolin e SHBA-së në mbrojtjen e lirisë, demokracisë dhe paqes në botë, si edhe partneritetin strategjik me Shqipërinë.

Në një postim në rrjetet sociale, Nufi solli në vëmendje fjalët e Thomas Jefferson në Deklaratën e Pavarësisë, duke theksuar se parimet mbi të cilat u themelua shteti amerikan mbeten edhe sot baza e demokracisë moderne.

“Fjalët postulat të frymëzuara nga Thomas Jefferson 250 vite më parë në Deklaratën e Pavarësisë, se ‘Ne i konsiderojmë këto të vërteta të vetëkuptueshme: se të gjithë njerëzit janë krijuar të barabartë dhe janë të pajisur nga Krijuesi i tyre me të drejta të patjetërsueshme, ndër të cilat janë jeta, liria dhe kërkimi i lumturisë’, janë edhe sot themeli mbi të cilin u ndërtua një komb, i cili me fuqinë e tij ka mbajtur pishtarin e Flakës së Perëndimit dhe të luftës për liri e demokraci kudo në botë”, u shpreh ministri.

Nufi vlerësoi gjithashtu kontributin e SHBA-së në mbrojtjen e vlerave demokratike, duke theksuar se bota demokratike i detyrohet Shteteve të Bashkuara për vendosmërinë në mbrojtje të këtyre parimeve.

“Perëndimi dhe bota demokratike i kanë një borxh të veçantë SHBA-së për forcën dhe vendosmërinë që ajo ka treguar dhe vazhdon të tregojë duke këmbëngulur pikërisht në këto vlera”, theksoi ai.

Ministri i Mbrojtjes nënvizoi se, Shqipëria dhe SHBA mbeten partnerë të palëkundur, të bashkuar nga vlerat e përbashkëta të lirisë, sigurisë dhe paqes.

Ai shprehu gjithashtu mirënjohjen e popullit shqiptar për mbështetjen amerikane ndër vite, duke veçuar kontributin e SHBA-së që nga mbështetja për pavarësinë e Shqipërisë, ndërhyrja e NATO-s në Kosovë në vitin 1999 dhe asistenca e vazhdueshme për vendin.

“Gëzuar 250-vjetorin e Pavarësisë së SHBA!”, përfundoi urimin ministri Ermal Nufi.

Burimi ATSH