Në kuadër të Javës së Muzeve 2026, një prej atraksioneve më të rëndësishme të kryeqytetit u kthye në një hapësirë ku u takuan historia, arti bashkëkohor dhe muzika.

Në Mozaikun e Tiranës u mbajt eventi 2026 “Beautiful Minds of Albania”, ndërsa ministri i Turizmit, Kulturës dhe Sportit, Blendi Gonxhja informoi se në këtë organizim u prezantuan për publikun projeksione vizuale inovative dhe rrëfime mbi figura shqiptare frymëzuese.

Gonxhja e cilësoi këtë një eksperiencë ndryshe për publikun, duke e transformuar sitin e trashëgimisë kulturore në një skenë bashkëkohore dialogu artistik dhe kujtese.

Ky event u mbështet nga Ministria e Turizmit, Kulturës dhe Sportit, teksa të angazhuara si artiste bashkëkohore vizuale dhe zëri ishin Suida Dushi dhe Gruda.

Prej datës 18 deri më 24 maj, muzetë, parqet arkeologjike dhe hapësirat e trashëgimisë kulturore në të gjithë Shqipërinë janë bërë pjesë e Javës së Muzeve 2026, duke mirëpritur qytetarët dhe vizitorët në një program të pasur me aktivitete kulturore, ekspozita, guida, performanca artistike dhe eksperienca edukative.

Përgjatë gjithë javës, në muze dhe site kulturore në mbarë vendin po zhvillohen aktivitete që synojnë afrimin e publikut me historinë, identitetin dhe vlerat tona kulturore, duke e kthyer kulturën në një përvojë të hapur, gjithëpërfshirëse dhe frymëzuese për të gjithë.

Burimi ATSH