Shqipëria do të përfaqësohet në Eurovision Song Contest 2026 me këngën “Nan”, të cilën e risolli në tingujt e pianos artisti Alis ndërsa përgatitet për garën e madhe.

Ministri i Turizmit, Kulturës dhe Sportit, Blendi Gonxhja, ndau në rrjete sociale momente nga takimi me artistin Alis, teksa vlerësoi dimensionin e lartë emocional dhe artistik të projektit përfaqësues.

“Ministria e Turizmit, Kulturës dhe Sportit e mbështet këtë rrugëtim përmes @cultur.alb jo vetëm si një përfaqësim artistik, por si një zë që mbart ndjenjën, kulturën dhe shpirtin shqiptar në një skenë ndërkombëtare”, u shpreh Gonxhja.

Kënga “Nan” vjen si një rrëfim emocional, që ndërthur thjeshtësinë me thellësinë artistike, duke synuar të prekë publikun evropian dhe të përcjellë ndjenjën dhe shpirtin shqiptar përmes muzikës.

Sipas ministrit Gonxhja, mbështetja institucionale synon jo vetëm përfaqësimin dinjitoz të vendit në skenën e Eurovision-it, por edhe promovimin e kulturës shqiptare si një vlerë që tejkalon kufijtë.

Ministri Gonxhja i uroi artistit Alis suksese në këtë garë ndërkombëtare, duke shprehur bindjen se përmes këtij përfaqësimi, Shqipëria do të vijë më pranë publikut evropian me një mesazh emocional dhe autentik.

Burimi ATSH