Ambasada gjermane në Tiranë konfirmoi sot se “Gjermania mbështet reformat që janë vendimtare për anëtarësimin në Bashkimin Europian të të gjitha vendeve të rajonit”.

Në përfundim të Ministerialit të Energjisë që u organizua në Mal të Zi, në kuadër të Procesit të Berlinit, me pjesëmarrjen e vendeve të Ballkanit Perëndimor, ambasada e Gjermanisë në Tiranë vlerëson se “Ballkani Perëndimor po jep rezultate duke kaluar nga planet, në zbatim”.

“Për tri ditë me radhë, fokusi i ministerialit ishte se si të avancojë konkretisht tranzicioni energjetik në rajon. Më shumë siguri energjetike; investime më të shpejta; zgjerimi i energjive të rinovueshme; bashkëpunim rajonal më i fortë”, thuhet në deklaratën e ambasadës gjermane.

Sipas ambasadës së Gjermanisë, bëhet falë për projekte konkrete në vend të strategjive të përgjithshme.

“Mesazhi është i qartë: Ballkani Perëndimor nuk është më një rajon që pret, por një rajon mundësish, përparimi dhe rezultatesh të prekshme. Gjermania e shoqëron këtë rrugë si iniciatore e Procesit të Berlinit që nga viti 2014 dhe mbështet reformat që janë vendimtare për anëtarësimin në BE të të gjitha vendeve të rajonit. Së bashku më të fortë. Së bashku drejt së ardhmes. Së bashku drejt BE-së”, thuhet në deklaratën e ambasadës gjermane.

Marrë nga ATSH