Ministri i Bujqësisë dhe Zhvillimit Rural, Andis Salla, deklaroi se qeveria ka hartuar një skemë të re mbështetëse për fermerët, me një fond prej 52 milionë euro nga buxheti i shtetit, i cili është në rritje krahasuar me vitin e kaluar.

Në seancën plenare të Kuvendit, duke iu përgjigjur akuzave të kreut të Partisë Demokratike, Sali Berisha, Salla tha se qeveria nuk po mbështet sektorin bujqësor, Salla theksoi se mbështetja totale për fermerët këtë vit kap vlerën mbi 100 milionë euro, përmes subvencioneve dhe pagesave direkte.

“Për fermerët shqiptarë është një skemë që e kemi përafruar me Bashkimin Evropian dhe financohet nga buxheti i shtetit me 52 milionë euro, në rritje kundrejt vititë kaluar. Përveç kësaj, kemi vendosur minimalisht 15 milionë euro për kompensimin në masën 10% të çdo fature për fermerët që punojnë tokën”, u shpreh ministri.

Sipas tij, kjo skemë pritet të gjenerojë një mbështetje totale që varion nga 45 deri në 50 milionë euro vetëm nga komponenti i kompensimit, ndërsa në tërësi financimi për sektorin bujqësor tejkalon 100 milionë euro.

Ministri bëri të ditur se skema e re përfshin të gjithë fermerët, nga sipërfaqe të vogla prej një metri katror deri te fermat e mëdha me 300-400 hektarë, duke garantuar përfshirje të gjerë dhe mbështetje për të gjithë aktorët e sektorit.

Salla theksoi se objektivi i qeverisë është që përmes këtyre politikave të çojë sektorin bujqësor në një fazë të re zhvillimi dhe ta afrojë atë me standardet evropiane.

/Burimi ATSH