Ministri i Bujqësisë dhe Zhvillimit Rural, Andis Salla deklaroi se paketa mbështetëse për bujqësinë për vitin 2026 është gjithëpërfshirëse dhe synon të ulë kostot për fermerët dhe të forcojë aktivitetin e tyre në sektor.

Në një konferencë për mediet, i pyetur specifikisht për skemën e naftës për bujqësinë, Salla tha se “vlera 5,2 miliardë lekë që kemi akorduar këtë vit në mbështetje të fermerëve është konceptuar për të ulur kostot e prodhimit dhe për të lehtësuar aktivitetin e tyre”.

Ministri theksoi se qeveria do të likuidojë 10% të faturimit të fermerëve si pjesë e paketës mbështetëse. “Kemi një konsolidim të paketës mbështetëse për bujqësinë. Për shembull, nëse një subjekt duhet të faturojë 10 milionë lekë, 1 milion do të kalojë direkt në llogarinë e tij”, deklaroi Salla.

Salla shtoi se përmes kësaj mase, qeveria synon të përmirësojë likuiditetin e fermerëve dhe të rrisë eficiencën e prodhimit bujqësor, duke kontribuar në zhvillimin e qëndrueshëm të sektorit.

“Investimet dhe mbështetja e drejtëpërdrejtë për fermerët konsiderohen kyçe për rritjen e prodhimit dhe zhvillimin ekonomik të zonave rurale”, deklaroi ministri.

Marrë nga ATSH