Ministri i Mbrojtjes, Ermal Nufi deklaroi se rezoluta e votuar sot në Kuvend nuk është një akt formal, por një qëndrim për sigurinë kombëtare të vendit.

Në reagimin në rrjetet sociale pas votimit në Kuvend, Nufi tha se “regjimi iranian ka përdorur ndër vite instrumente terroriste dhe mjete hibride për të shtrirë ndikimin e tij, përfshirë edhe në rajonin tonë”.

“Në vitin 2022, Shqipëria u përball drejtpërdrejt me këtë kërcënim, përmes një sulmi kibernetik ndaj institucioneve shtetërore, dhe gjithashtu sulmi i fundit kibernetik ndaj Parlamentit të Republikës është një akt i papranueshëm ndaj një vendi anëtar të NATO-s”, tha Nufi, duke nënvizuar se sot nuk u votua thjesht një tekst, por u votua për sigurinë, aleancat dhe parimet që vendi ynë mbron.

Kuvendi miratoi sot projektrezolutën e propozuar nga Partia Socialiste, për shpalljen e Republikës Islamike të Iranit si shtet sponsor i terrorizmit dhe shtet që përdor mjete terroriste, si dhe shpalljen e Gardës Revolucionare Islamike (IRGC), si organizatë terroriste.

Kuvendi votoi me 79 vota pro dhe 1 abstenim duke miratuar projektrezolutën.

Burimi ATSH