Kryetari i Partisë Demokratike, Sali Berisha, reagoi sot pas miratimit të rezolutës për shpalljen e Republikës Islamike të Iranit si shtet sponsor i terrorizmit dhe shtet që përdor mjete terroriste.

Deputetët e grupit parlamentar të PD-së nuk ishin sot të pranishëm në seancën plenare të Kuvendit, ku u miratua rezoluta që e shpall Iranin shtet sponsorizues të terrorizmit.

Ndërkohë, përmes një deklarate në rrjetet sociale, në lidhje me zhvillimet në Iran, theksohet se PD e shpall Gardën Revolucionare të Iranit si organizatë terroriste.

Në deklaratë theksohet se PD mbështet përpjekjet e SHBA dhe Izraelit për të përmbysur diktaturën mizore teokratike të Ajatollahëve.

“Partia Demokratike e Shqipërisë shpall Gardën Revolucionare të regjimit diktatorial të Teheranit si organizatë terroriste. Ajo e cilëson shtetin obskurantist të Ajatollahëve si sponsorin kryesor të terrorizmit në botë dhe një kërcënim madhor për paqen dhe stabilitetin në Lindjen e Mesme dhe kudo në glob.

“Partia Demokratike e Shqipërisë dënon me forcën më të madhe sulmet e Teheranit ndaj vendeve të Gjirit Persik, Arabisë Saudite, Emirateve të Bashkuara Arabe, Katarit, Kuvajtit, Bahrejnit dhe vendeve të tjera mike të Shqipërisë dhe ju shpreh këtyre vendeve solidaritetin e saj të plotë”, thekson PD.

Më tej, në deklaratë theksohet se “Partia Demokratike mbështet përpjekjet e SHBA-së dhe Izraelit për përmbysjen e diktaturës mizore teokratike të Ajatollahëve dhe zëvendësimin e këtij regjimi me një qeveri të zgjedhur nga populli si një kontribut madhor për çlirimin e popullit iranian, si dhe për garantimin e paqes dhe stabilitetit në rajon e më gjerë”.

Burimi ATSH