Drejtori i Përgjithshëm i Doganave, Besmir Beja, zhvilloi një takim me të Ngarkuarën me Punë të Ambasadës së SHBA-së në Shqipëri, Nancy VanHorn, ku u diskutua për forcimin e bashkëpunimit kundër kontrabandës dhe krimit ndërkombëtar.

Gjatë takimit u diskutua mbi forcimin e bashkëpunimit dypalësh në fushën e administrimit doganor, rritjen e sigurisë kufitare luftën kundër trafiqeve të paligjshme dhe përmirësimin e mëtejshëm të klimës së biznesit

Beja theksoi rëndësinë e modernizimit të shërbimeve doganore, rritjes së transparencës dhe integritetit institucional, si dhe përmirësimit të klimës së biznesit përmes procedurave të standardizuara dhe të thjeshtuara.

Ai shtoi se Dogana Shqiptare do të vijojë të luftojë trafikun e paligjshëm, kontrabandën dhe korrupsionin, duke garantuar kontroll më të fortë të lëvizjes së mallrave sipas standardeve ndërkombëtare.

Nga ana e saj, VanHorn vlerësoi rolin e Doganës në rritjen e të ardhurave për buxhetin dhe krijimin e një ambienti më të favorshëm për investime. Diplomati amerikane theksoi se SHBA do të mbështesë përpjekjet për rritjen e kapaciteteve profesionale, forcimin e sigurisë kufitare dhe zgjerimin e bashkëpunimit ekonomik mes dy vendeve.

Në takim u diskutua gjithashtu për shkëmbimin e praktikave më të mira, asistencën teknike dhe projekte që synojnë eficiencën e administratës doganore dhe lehtësimin e tregtisë legjitime.

Dogana Shqiptare synon të sigurojë standarde të larta sigurie dhe shërbim cilësor ndaj qytetarëve dhe bizneseve, duke mbështetur zhvillimin ekonomik dhe integrimin e vendit në tregjet ndërkombëtare.

Burimi ATSH